လက်ယဉ်လာကြပြီ

လက်ယဉ်လာကြပြီ

---

ဒုတိယကမ္ဘာစစ်ကာလ..

အာဖရိကသဲကန္တာရထဲမှာ ဂျာမန်ဗိုလ်ချုပ်ကြီးရွန်းမဲလ်ရဲ့တင့်ကားတပ်တွေနဲ့ထိပ်တိုက်ရင်ဆိုင်ခဲ့တဲ့ အင်္ဂလိပ်အမေရိကန်မဟာမိတ်တပ်ဖွဲ့တွေအကြောင်း ဖြစ်ရပ်မှန်အခြေခံရုပ်ရှင်ကားတခုရဲ့ဇာတ်ဝင်ခန်း..

တင့်ကားတွေ တဖက်နဲ့တဖက်အဝေးကနေပစ်ခတ်..

နောက်ဆုံးမှာ အနီးကပ်ရင်ဆိုင်တိုက်ပွဲဖြစ်.. 

သေနတ်တွေနဲ့ပစ် လှံစွပ်နဲ့ထိုး ဒါးတွေနဲ့ခုတ်ပေါ့..

---

ရန်သူဂျာမန်၂ ယောက်ကိုအနီးကပ်သေနတ်နဲ့ပစ် ဒါးနဲ့ထိုးသတ်လိုက်ရလို့ တိုက်ပွဲအပြီး တုန်တုန်ရင်ရင်ဖြစ်နေတဲ့ အမေရိကန်စစ်သားလေးကို တပ်ကြပ်ကြီးကမေးတယ်..

Is it your first kill?

"ဒါ မင်းပထမဆုံးသတ်ဘူးတာလား"

"ဟုတ်.."

"အေး.. နောက်တော့အသားကျသွားပါလိမ့်မယ်ကွာ .. ရော့..ရေလေးနဲနဲသောက်လိုက်"..

---

အခုနောက်ပိုင်းတွေမှာတော့..

စစ်မြေပြင်ထွက်တဲ့ စစ်သားတွေ လက်နက်ကိုင်သူပုန်တွေဟာ ရုပ်ရှင်တွေထဲမှာလို တယောက်နဲ့တယောက်သစ်ပင်ခြုံပုတ်အကွယ်မှာအပြန်အလှန်တွေပစ်ကြ အနီးကပ်လုံးထွေးကြဆိုတဲ့ အနိဌါရုံအတွေ့အကြုံတွေသိပ်မရှိတော့ပါဘူး..

ရှေ့တန်းစစ်မြေမှာ ရန်သူကိုတိတိကျကျချိန်ရွယ်ပစ်ပြီး ငါတော့ဘယ်နှစ်ယောက်သတ်နိုင်ခဲ့တယ် ဘယ်နှစ်လောင်းရခဲ့တယ်လို့ ကြွားနိုင်သူ ပြောနိုင်သူအတော်ရှားပါတယ်.. ကြွားချင်ပြောချင်သူလဲသိပ်မရှိကြပါဘူး..

စခန်းသိမ်းတိုက်ပွဲကြီးတွေမှာဆို အဝေးကလက်နက်ကြီးတွေနဲ့အယင်ပစ် .. နောက်မှ လက်နက်ငယ်တွေနဲ့ဒလဟောပစ်ပြီး ဝင်လုံးရတာဆိုတော့ "သေသူနဲ့ကိုယ်နဲ့အကြား တိကျတဲ့ဆက်စပ်မှု" သိပ်မရှိကြတော့ဘူး..

ဒီလိုအတိအကျ မဆက်စပ်တာတောင်မှဘဲ တိုက်ပွဲမှာအပြန်အလှန်ရမ်းသန်းပစ်ခတ်တာတွေလုပ်ခဲ့အပြီး ၂ဘက်အကျအဆုံးနဲ့အနိဌါရုံတွေမြင်ခဲ့ရတဲ့အပေါ် ကိုယ့်ရဲ့လုပ်ရပ်/ကိုယ့်ရဲ့အပြစ်အဖြစ် စိတ်သန္တာန်မှာထင်ကျန်ပြီး အိမ်မက်ဆိုးမက်ရသူတွေရှိတယ် ..

"Post Traumatic Stress Disorder (PTSD)" ဆိုတဲ့စစ်ပြန်တွေခံစားရတဲ့စိတ်ဝေဒနာတွေထဲမှာ အဲဒါပါတယ်..

---

ဆိုလိုချင်တာကတော့ စစ်ဗိုလ်စစ်သားဘဲဖြစ်ဖြစ် သူပုန်တွေထဲမှာဘဲဖြစ်ဖြစ် ရန်သူကိုတိတိကျကျရည်ရွယ်ပစ်သတ်ဘူးသူ (တနည်းအားဖြင့်ပြောရယင်) "လူသတ်ခြင်းဆိုတဲ့အမှု"ကိုသွေးအေးအေးနဲ့ကျုးလွန်ခဲ့ဘူးသူ/ကျုးလွန်ချင်သူ အလွန်ရှားပါးတယ်လို့ပြောချင်တာ..

---

အခုတော့..

စစ်မြေမဟုတ်တဲ့ မြို့ပြကျေးရွာတွေမှာ 

တဖက်ကလဲ လက်နက်မဲ့ပြည်သူတွေကိုပစ်ခတ်တယ်.. 

တဖက်ကလဲ တဇွပ်ဇွပ် တဖေါင်းဖေါင်းတွေလုပ်လာတယ်..

ကျနော်တို့လူဘောင်ဟာ လူသတ်မှုတွေနဲ့ အသားကျ ယဉ်ပါးလာနေကြပြီလား..

ခိုင်းသူတွေက"နှုတ်ယဉ်"သလို လုပ်သူတွေကလဲ"လက်ယဉ်"လာနေကြပြီလား..

သတ်တယ်ဖြတ်တယ်ဆိုတာတွေဟာနိစ္စဓူဝ..

အဆန်းတကြယ်မဟုတ်တော့ပြီလား..

"အသက်ရှင်သန်ရပ်တည်မှု"ဆိုတဲ့ မူလပထမ လူသားတို့ရဲ့အခွင့်အရေးဥပဒေသကြီးကျိုးပေါက်နေပြီပေါ့ ..

"တနေ့မှာ ဒါတွေကိုဘယ်သူတွေကတာဝန်ခံကြမှာလဲ"..

---

လက်ခုပ်လက်ဝါးတီးနေကြသူတွေအများကြီး..

လူသတ် လူသေတာတွေကိုဝမ်းသာစရာအဖြစ်မြင်နေကြတယ်..

---

သတင်းတွေမှာ..

ဘဂ္ဂဒက် ထရစ်ပိုလီ ဒမတ်စကပ် မြို့ကြီးတွေမီးလောင်ပြာကျတဲ့အကြောင်းမြင်ရလို့ ကျနော်မပျော်ခဲ့ဖူးဘူး..

WTO အဆောက်အဦကြီးကိုလေယာဉ်နဲ့တိုက် ဘာလီမှာဗုံးကွဲ အီဂျစ်မှာတိုးရစ်တွေကိုသေနတ်နဲ့ပစ် လန်ဒန်မှာလူတွေကိုကားနဲ့တိုက် ဂျာမဏီမှာဒါးနဲ့ထိုး ..

ဒါတွေကြားရလို့ကျနော်ဟေးဟေးဝါးဝါးထမအော်ခဲ့ဘူး..

---

extrajudical killings လို့ခေါ်တဲ့ ဥပဒေမဲ့သတ်ဖြတ်မှုတွေ..

Lynching လို့ခေါ်တဲ့ ဒေါသ/ခံစားမှုလွန်ကဲပြီးစီရင်သတ်ဖြတ်မှုတွေ..

လူနေရပ်ကွက်ထဲဗုံးထောင်ဗုံးခွဲမှုတွေ..

သူရဲဘောကြောင်တဲ့လုပ်ကြံသတ်ဖြတ်မှုတွေ ဆိုယင်..

သတင်းသမားတယောက်အနေနဲ့ စုံစမ်းသတင်းရေးရတာတောင် အလွန်စိတ်မချမ်းမသာနဲ့ မသဒီဖြစ်ရတယ်..

မြိန်ရေလျှက်ရည်သဘောပြောနေတဲ့အပေါင်းအဖေါ်သတင်းလောကသားတချို့ကိုလဲအံ့သြမိတယ်..

---

"ဓမ္မ အဓမ္မ"နဲ့ "တရားသောစစ်"ဆိုတဲ့အကြောင်းတတ်သလောက်မှတ်သလောက်နဲ့တော့လာမငြင်းပါနဲ့ခင်ဗျာ..

ခရူးဆိတ်/ဂျီဟတ်/Infidel (ကိုယ့်တရားတော်အပေါ်မသက်ဝင်သူ) ဆိုတဲ့အကြောင်းတွေ လဲကျနော်ဖတ်ခဲ့မှတ်ခဲ့ဘူးပါတယ်..

ဘာဘီလုံခေတ်က "ဟာမူရာဘီကိုဓ"ဥပဒေ The Code of Hummurabi အကြောင်းလဲကျနော်သိပါတယ်..

---

ကိုယ်ဘယ်ကိုဦးတည်နေတယ်ဆိုတာမသေချာရင်..

ခဏရပ်ပြီး ဘေးဘီကိုအကဲခတ်..

"မြေပုံညွှန်းနဲ့ လားရာ ပြန်တိုက်ကြည့်ကြဘို့" လိုတယ်..

သန်းလွင်ထွန်း

၃ နိုဝင်ဘာ ၂၀၂၁